Ережелер

Дәулет Астана «Теннис федерациясы» РҚБ

филиал директорының   2025 жылғы «22» желтоқсандағы № 2  

                                                                        бұйрығымен

                                                                         БЕКІТІЛДІ

 

«Дәулет Астана» «Теннис федерациясы» РҚБ
филиалының жанындағы

«Дәулет» теннис орталығы» Клубының

ЕРЕЖЕЛЕРІ

 

1. Негізгі ұғымдар

1.1. «Клуб» — осы Ережелердің талаптарын орындайтын  Клуб мүшелері мен Клиенттердің теннис корттарында тенниспен айналысу үдерісін ұйымдастыру және сүйемелдеу мақсатында құрылған адамдар бірлестігі.

1.2. «Клуб мүшесі» — Клубта жаттығатын және осы Ережелерді қабылдап, орындайтын 3 жастан 18 жасқа дейінгі, бала.

1.3. «Клиент» — осы Ережелерді қабылдап  орындайтын, Клуб қызметтерін пайдаланатын Клуб мүшесі болып табылмайтын  бала немесе ересек адам, тұлға.

1.4. «Қонақ» — Клуб мүшесінің /Клиенттің Клуб аумағына алып келген адамы. Барлық Қонақтарға осы Ережелердің талаптары қолданылады. Клуб мүшесі/Клиент өзі алып келген адамдардың осы Ережелерді сақтауына, сондай-ақ Клуб мүлкіне келтірілген залал үшін ортақ жауапкершілік жүктеледі.  Қонақтың келтірілген залалды өтеу бойынша міндеттемелерінің өз бөлігін орындау мүмкіндігі болмаған жағдайда, келтірілген залал  үшін жауапкершілік толық көлемде Клуб мүшесіне/Клиентке жүктеледі.

1.5. «Жаттықтырушы» — тенниспен айналысуға арналған оқу және ойын үдерісін қамтамасыз ететін тәжірибелі тәлімгер.

1.6. «Клуб әкімшілігі» — жаттықтырушыларды басқаратын, жаттығу үдерісін  ұйымдастыратын, бағдарламалар мен топтардың жаттығу кестесін бекітетін Клуб қызметкерлері.

1.7. «Бір реттік келу» — теннис кортында теннис ойнауға арналған бір реттік жаттығу есептеледі.

1.8. «Кортты жалға алу» — брондау және төлем жасалғаннан кейін Клиентке белгілі бір келісілген уақытта теннис кортын пайдалануға Клубтың берген рұқсаты.

1.9. «Балалар тобы» — топ дәрістерінің бекітілген кестесіне, прейскурантқа және Клуб бағдарламаларына сәйкес, жаттықтырушының жетекшілігімен теннис корттарында 4-тен 12 адамға дейінгі құрамда  Клуб мүшелеріне арналған жаттығулар.

1.10. «Ересектер тобы» — топ дәрістерінің бекітілген кестесі мен Клуб бағдарламаларына сәйкес, теннис корттарында жаттықтырушының жетекшілігімен 6 адамға дейінгі құрамдағы Клиенттерге арналған жаттығулар.

1.11. «Ойын уақыты» — кестеге сәйкес Клуб мүшесіне/Клиентке берілетін, теннис кортындағы нақты болу уақыты.

2. Жалпы ережелер

2.1. Осы Ережелер Клуб қызметтерін пайдаланатын Клуб мүшелеріне, Клиенттерге және олардың Қонақтарына қолданылады.

2.2. Осы Ережелер «Дәулет» теннис орталығы (мәтін бойынша  бұдан әрі — Клуб) мен Клуб мүшелері/Клиенттер арасындағы қарым-қатынастың негіздері, Клуб қызметтерін ұсыну және төлеу тәртібін, сондай-ақ Клуб аумағындағы мінез-құлық нормаларын реттейді.

2.3. Клуб Қазақстан Республикасы, 010000, Астана қаласы, Алматы ауданы, Оңтүстік-Шығыс тұрғын алабы (оң жақ), Қордай көшесі, 6 мекенжайындағы Теннис орталығының аумағында орналасқан.

2.4. Клуб қызметтері үшін төлем жасау Клуб мүшесінің/Клиенттің осы Ережелермен және Клуб туралы Ережемен толық келісетінін білдіреді.

2.5. Осы Ережелер бұзылған жағдайда, Клуб Клуб мүшесіне/Клиентке ақшалай өтемақысыз қызмет көрсетуден бас тартуға құқылы.

2.6. Өткізіп алынған жаттығуларды басқа уақытқа ауыстыру қарастырылмаған. Клуб әкімшілігі жаттықтырушыны ауыстыруға және жаттығу кестесін өзгертуге құқылы.

2.7. Жаттығуға 10 минуттан артық кешіккен жағдайда, Клуб мүшесінің /Клиенттің сабаққа қатысу мүмкіндігі жеке жаттықтырушының келісімімен анықталады.

2.8. Клуб біржақты тәртіпте осы Ережелерге өзгерістер мен толықтырулар енгізуге  құқылы. Жаңа Ережелер ақпарат көздерінде (стендтерде, әлеуметтік желілерде) жарияланған сәттен бастап күшіне енеді.

3. Қызмет көрсету және корттағы ойын уақытын ұсыну тәртібі

3.1. Клуб мүшелері/Клиенттер Клубқа тек жұмыс уақытында және қызметтерге төлем жасағаннан кейін немесе мүшелік жарна салғаннан кейін ғана келе алады.

3.2. Клуб топтық жаттығулардың кестесін өзгертуге құқылы. Өзгерістер туралы ақпарат ақпараттық стендтерде және әлеуметтік желілерде (WhatsApp, Instagram және т.б.) жарияланады.

3.3. Ойын уақыты аяқталғаннан кейін Клуб мүшесі/Клиент кортты уақтылы босатады.

3.4. Клуб ойын уақытын Клиенттердің өтінімдері (броньдары) негізінде, корттардың жұмыс кестесін, жарыстарды, клубтық іс-шараларды, жөндеу-алдын алу жұмыстарын, ауа райы жағдайларын ескере отырып береді. Брондау Клуб әкімшісі немесе жаттықтырушы арқылы жүзеге асырылады. Броньның расталуы — 100% алдын ала төлем.

3.5. Қызметтер үшін төлем мерзімі бұзылған жағдайда, Клуб мүшесіне/Клиентке  берілетін ойын уақытының сақталуына Клуб жауапкершілікті алмайды.

3.6. Клуб жарыстар, клубтық іс-шаралар, корттарды пайдалануға мүмкіндік бермейтін  техникалық ақаулар кезінде жаттығу  кестесіне өзгерістер енгізуге  құқылы және бұл туралы Клуб мүшесіне алдын ала телефон арқылы хабарлауға міндетті.

3.7. Брондалған /резервіленген ойын уақытынан бас тарту жаттығу басталғанға дейін кемінде 4 (төрт) сағат бұрын телефон арқылы хабарлау арқылы жүргізіледі.

3.8. Клуб мүшесінің/Клиенттің брондалған/резервіленген  сабағына келмеген жағдайда немесе Осы ережелердің 3.7-т. көзделген мерзімнен кейін хабарлаған  жағдайда,  сабақ өткізілген болып есептеледі және алдын ала төлем сомасынан қызмет құны ұсталады немесе брондалған қызметтер бағасының мөлшерінде айыппұл салынады.

4. Клуб қызметтерін төлеу тәртібі

4.1. Клуб ұсынған қызметтерге  төлем қолданыстағы бекітілген прейскурант негізінде жүзеге асырылады.

4.2. Брондалған ойын уақыты үшін 100% төлемі  тек кортқа шығар алдында ғана жасалады.

4.3. Жеке жаттығулардың төлемі сабақтың бірінші күнінен кешіктірілмей жүргізіледі.

4.4. Топтық жаттығулар үшін төлем ағымдағы айдың 1-іне дейін жасалуы тиіс.

4.5. Мүшелік жарналар қолма-қол ақшасыз төленеді.

4.6. Клуб қызметтер бағасын және мүшелік жарна мөлшерін өзгерту құқығын өзіне қалдырады. Жаңа бағалар бойынша төлем жарияланған сәттен бастап қолданылады. Баға көтерілген сәтте алдын ала төленген сабақтардың құны қайта қаралуға жатпайды.

5. Клуб аумағы мен корттардағы мінез-құлық ережелері

5.1. Теннис ойнау үшін кортты жалға алған кезде  корттағы ойыншылардың  жалпы саны 4 адамнан артық болмауы тиіс. Кортта 5 адамнан артық болған жағдайда қолданыстағы бекітілген прейскурантқа сәйкес төлем екі есе алынады.

5.2. Ойын уақыты 10 минуттан артық асқан жағдайда, Клуб қызметтерінің бағасы Клуб мүшесінің/Клиенттің  60 минуттық тарифтік жоспары бойынша  төленеді.

5.3. Кортқа тек спорттық киімде және таза, ауыстыратын, табаны ашық аяқ киімде келуге рұқсат етіледі. Егер табаны қара болса, онда  «NON MARKING» белгісі болуы шарт Жалаңаш денемен жаттығуға тыйым салынады.

5.4. Сүйемелдеуші адамдарға және қызмет етуші персоналға ойын алаңына тек жалпақ табанды аяқ киіммен және бахилаларда кіруге рұқсат етіледі, өкшелі аяқ киім киюге қатаң тыйым салынады.

5.5. Балалар топтық жаттығулары үшін  кортқа шығу тек жаттықтырушының ұйымдастыруымен жүргізіледі.

5.6. Топтық балалар жаттығулары кезінде ата-аналардың қатысуына тыйым салынады.

5.7. Жаттығу басталғанға дейін ойын алаңдарының жабындысында кез-келген ақаулар анықталған жағдайда, Клуб мүшесі/Клиент бұл туралы жаттықтырушыға және әкімшіге дереу хабарлауы қажет.

5.8. Клуб мүшесі/Клиент жаттығу кезінде өзін жайсыз сезінген жағдайда, жаттығуды тоқтатып, алғашқы медициналық көмек алу үшін  Клубтың қызметкерлеріне жүгіну қажет.

5.9. Клуб мүшесі/Клиент қоғамдық зоналарда, ойын алаңдарында және Клуб территориясына кіретін аумақтарда  тазалық сақтау міндетті.

5.10. Клуб мүшелері/Клиенттер және олардың қонақтары қоғамдық тәртіп ережелеріне және дұрыс мінез-құлық нормаларына сәйкес әрекет етуі керек, өз сөзінде бейәдеп сөздерді қолданбауы керек, қызметкерлер мен келушілерге қолайсыздық туғызбауы керек.

5.11. Сабақ уақытына Клубтың беретін кез келген мүкәммалы жоғалған немесе бүлінген жағдайда Клуб мүшесі/Клиент немесе Қонақ Клубқа келтірілген залалды прейскурантпен (немесе Клуб бухгалтерімен) айқындаған мөлшерде өтейді.

5.12. Қонақтар  жаттығу және ойын үдерсіне араласуына құқығы жоқ.

5.13. Клуб аумағындағы жеке жаттығуларды тек Клуб жаттықтырушыларымен ғана өткізуге болады.

5.14. Клуб мүшелері / Клиенттер және олардың қонақтары Теннис корттарынан Клубтың белгілеген жұмыс уақытынан кешіктірмей кетуі керек.

5.15. Жаттығу аяқталғаннан кейін Клуб мүшесі/Клиент және оның қонақтары спорттық жабдықтарды арнайы белгіленген орындарға тиісті жағдайда қайтаруға міндетті. Клубтың жабдықтары мен керек-жарақтарының жоғалуы немесе бүлінгені үшін Клуб мүшесі/Клиент және оның қонақтары толық материалдық жауапкершілікке тартылады.

5.16. Клуб аумағында тыйым салынады:

— ойын алаңдарының жабынына, жабдықтарына, бөлу торына, құрылыстың қабырғаларына ракеткамен немесе өзге заттармен соққы беру, жабдыққа және корттардың, сондай-ақ Клубтың өзге де үй-жайларының жабынына зақым келтіруі мүмкін болатын іс-әрекеттер жасауға. Клубтың мүлкі, мүкәммалы мен жабдығы бүлінген жағдайда Клуб мүшесіКлиент залалды ҚР азаматтық заңнамасына сәйкес толық көлемде өтеуге міндетті;

— апаттық есіктерді арнайы бұйрықсыз және жауапты қызметкердің бақылауынсыз өз бетінше ашу-бұл жарақатқа әкелуі мүмкін;

-жабық пластикалық бөтелкелердегі суды қоспағанда, ойын алаңдары мен киім ауыстыратын бөлмелерде тамақ, йогурт, қантты тағамдар мен қантты сусындар және т. б. әкелу және тұтыну;

— алкоголь, есірткі қолдану;

— ойын алаңдарында және әкімшілік үй-жайларда темекі шегу;

— жаттығу орындау кезінде айқайлау, балағат сөздер айту, қатты сөйлеу және басқалардың назарын аудару;

— жеңіл жанып кететін, жарылғыш заттарды, қару — жарақ пен оқ-дәрілерді алып кіру;

— Клуб әкімшілігімен арнайы келісімінсіз бейне және фототүсірілім жүргізу;

— Клуб әкімшілігінің келісімінсіз кортта дыбыс шығаратын техниканы пайдалану

— Клуб аумағында тауарлар мен қызметтерді рұқсатсыз сату, жарнамалық өнімдерді тарату, жарнамаларды жариялау.

— Клуб басшылығының келісімінсіз Турнирлер өткізу.

Клуб аумағында мінез-құлықтың, қоғамдық тәртіптің жалпыға бірдей танылған нормалары мен ережелерін бұзуға, айналасындағыларға құрметсіздік танытуға, айналасындағыларға зорлық-зомбылық(төбелес, шатыс, қақтығыстар)  қолдануға ТЫЙЫМ САЛЫНАДЫ.

— булинг көрінісі, яғни бір адамның  (Буллер) немесе агрессорлар тобының жүзеге асыратын тұрақты психологиялық немесе физикалық қысымы.

Клуб әкімшілігі мен жаттықтырушылар алкогольдік немесе есірткілік мас күйіндегі адамдарды  сабаққа жібермеу құқығын өзіне қалдырады.

 

6. Қорытынды ережелер

6.1. Клуб әкімшілігі Клуб мүшесіне/Клиентке сабақ басталмай тұрып дәрігерлік медициналық тексеруден өтуге кеңес береді. Әкімшілік Клуб мүшесінің/Клиенттің денсаулығына немесе сабақ кезінде денсаулығының нашарлауына жауап бермейді. Топтағы ойын уақытын немесе сабақтарын төлеп, мүшелік жарнаны төлей отырып, Клуб мүшелері/Клиенттер осы Ережелермен келіседі және Клуб аумағында болуы мүмкін жарақаттар, денсаулығының нашарлауы немесе жазатайым оқиғалар үшін Клубты жауапкершіліктен босатады.

6.2. Клуб мүшелері әр 6 ай сайын Клубқа денсаулық туралы медициналық анықтама беруге міндетті.

6.3. Егер Клуб мүшесінде/Клиентте немесе Қонақта жедел және/немесе созылмалы инфекциялық және/немесе тері ауруы бар деп күдіктенсе, Клубқа келуге тыйым салынады. Осы Ереже сақталмаған жағдайда Клуб әкімшілігі Клуб мүшесін/Клиентті/Қонақты корттарға барудан толық сауығып кеткенге дейін немесе маманның (дерматолог, инфекционист) консультациясын өткізгенге дейін және жаттығуға жіберу мүмкіндігі туралы маманның қорытындысын алғанға дейін уақытша шеттету құқығын өзіне қалдырады.

6.4. Клуб киім ауыстыратын бөлмелер мен спорттық ғимараттарда қалдырылған заттар үшін, сондай-ақ шкафтарда қалдырылған заттар үшін жауап бермейтініне назар аударыңыз. Клуб жоғалған немесе қараусыз қалған заттар үшін де жауап бермейді. Ұмытылған нәрселер туралы ақпаратты рецепцияда әкімшіден алуға болады.

6.5. Клуб аумағында 18 жасқа дейінгі балалар үшін ата-аналар жеке жауапкершілікті аладыК 10 жасқа дейінгі балалар Клубқа ата-аналарының немесе олар уәкілеттік берген адамдардың еріп жүруімен келуге міндетті.